ចិន៖ សមាគមកីឡាហុងកុង ត្រូវបានណែនាំឱ្យដាក់ពាក្យ “ចិន” ភ្ជាប់ជាមួយនឹងឈ្មោះផ្លូវការនៃសមាគមកីឡានីមួយៗ ឬបើមិនដូច្នោះទេសមាគមកីឡានឹងប្រឈមការដកចេញនូវថវិកាទ្រទ្រង់ដំណើរការ។ គួរឱ្យដឹងថា ការណែនាំនេះបានធ្វើឡើងក្រោយពេលអាជ្ញាធរកីឡាប្រកាន់ខ្ជាប់នូវគោលការណ៍ជាតិនិយម ក្រោយពីមានការតវ៉ាទាមទាររកការគាំទ្របែបលទ្ធិប្រជាធិបតេយ្យ។

សហព័ន្ធកីឡា និងគណៈកម្មធិការអូឡាំពិកហុងកុង នៃប្រទេសចិន បានបញ្ជាក់ឱ្យប្រភពសារព័ត៌មានដឹងថា បណ្តាប្រទេសជាសមាជិកនៃសហព័ន្ធកីឡានីមួយៗមានពេលវេលារហូតដល់ត្រឹមថ្ងៃទី០១ ខែកក្កដា សម្រាប់ការបំពេញបែបបទនៃការផ្លាស់ប្តូរឈ្មោះថ្មី។

គួរឱ្យដឹងថា ហុងកុង គឺជាតំបន់រដ្ឋបាលស្វយ័តពិសេសមួយក្រោមការគ្រប់គ្រងរបស់ចិន ប៉ុន្តែធ្វើការប្រកួតប្រជែងក្នុងនាមក្រុមតំណាងហុងកុងដោយឡែកពីប្រទេសចិន នៅក្នុងព្រឹត្តិការណ៍ប្រកួតកីឡាអន្តរជាតិ រាប់បញ្ចូលទាំងកីឡាអូឡាំពិកផងដែរ។ មកទល់ពេលនេះ មានសមាគមកីឡាហុងកុងចំនួនប្រមាណ ២០ប៉ុណ្ណោះ ក្នុងចំណោមសមាគមកីឡាចំនួន ៨៣ ដែលមានភ្ជាប់ប្រទេសចិន ក្នុងឈ្មោះរបស់ខ្លួន ដែលក្នុងនោះរួមមាន សហព័ន្ធកីឡាហែលទឹកហុងកុង-ចិន ជាដើម ប៉ុន្តែសហព័ន្ធកីឡាធំៗដូចជាបាល់ទាត់ជាដើម មិនបានភ្ជាប់ប្រទេសចិនជាមួយឈ្មោះសមាគមឡើយ។

កន្លងមក ភាពតានតឹងរវាងហុងកុង និងចិន ធ្លាប់បានកើតមានជារឿយៗក្នុងព្រឹត្តិការណ៍កីឡា ដោយអ្នកគាំទ្របាល់ទាត់ហុងកុងកន្លងមក ធ្លាប់បានធ្វើឱ្យរដ្ឋាភិបាលចិនខឹងសម្បារពីការស្រែកចំអកដល់ការច្រៀងចម្រៀងជាតិមុនការប្រកួតចាប់ផ្តើម ដែលក្រោយមកទង្វើនេះត្រូវបានច្បាប់ហាមឃាត់។

គួរបញ្ជាក់ថា សព្វថ្ងៃនេះគណៈកម្មាធិការអូឡាំពិកហុងកុង ដឹកនាំដោយអតីតសមាជិកសភាចិន លោក Timothy Fok ដែលមាននិន្នាការគាំទ្ររដ្ឋាភិបាលទីក្រុងប៉េកាំង៕